ຫໍພຣະບາງ ສ້າງຂື້ນໃນປີ ຄ.ສ 1969, ໃນຣາຊການຂອງພຣະບາດສົມເດັດພຣະເຈົ້າມະຫາຊີວິດ ສີສະວ່າງ ວັດທະນາ ( ສຣີສວ່າງ ວັດທະນາ ), ຊຶ່ງອອກແບບໂດຍ: ນາຍຊ່າງຊາວຫຼວງພະບາງຊື່: ທ່ານ ມະນີວົງ ຂັດຕິຍະຣາດ ສໍາຫລັບໂຄງສ້າງເປັນແບບ ເອກະລັກສິລະປະສະກຸນຊ່າງລາວ ຫລວງພະບາງໂດຍແທ້ ແລະ ການກໍ່ສ້າງໃນຄະນະນັ້ນ ຍັງບໍ່ທັນສໍາເລັດເປັນພຽງກໍ່ສ້າງຮາກຖານ ແລະ ເສົາ ຈໍານວນໜຶ່ງເທົ່ານັ້ນ ພາຍຫລັງໄດ້ປັບປຸງປ່ຽນແປງພຣະຣາຊວັງມາເປັນຫໍພິພິທະພັນແຫ່ງຊາດຫຼວງພະບາງ ໃນວັນທີ່ 13 ເມສາ (03) 1976, ປີ ຄ.ສ 1993 ທາງລັດທະບານກໍ່ຄືອໍານາດການປົກຄອງແຂວງໄດ້ມອບໃຫ້ ພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ແຂວງຫຼວງພະບາງ ສືບຕໍ່ດໍາເນີນການກໍ່ສ້າງເປັນໄລຍະເລື້ອຍໆ ມາຈົນສໍາເລັດສົມບຸນ ໃນວັນທີ 28 ສິງຫາ (08) 2011. ຕໍ່ມາຈົນມາເຖິງວັນທີ 14 ທັນວາ (12) 2013 ໄດ້ອັງເຊີນອົງພຣະບາງ ຂື້ນປະດິດສະຖານຢູ່ ຫໍພຣະບາງແຫ່ງນີ້ ຈົນເຖິງປັດຈຸບັນ.

ປະຫວັດພະບາງ

ພະບາງ ແມ່ນບ່ອນກຳເນີດຂອງຄວາມເຊື່ອຂອງຄົນລາວ. ນໍາມາຈາກປະເທດກຳປູເຈຍໃນສະຕະວັດທີ 14, ອີງຕາມຕໍານານ, ພະບາງຖືກຫຼໍ່ຫຼອມມາຈາກຄຳ ແລະ ທອງສໍາລິດ ທີ່ບໍລິສຸດໃນປະເທດສີລັງກາ ແລະ ຈາກນັ້ນໄດ້ນຳຖວາຍແກ່ເຈົ້າຊີວິດແຫ່ງສີລັງກາ. ຕໍ່ມາກໍ່ໄດ້ນຳເອົາມາຖວາຍແກ່ເຈົ້າຊີວິດກຳປູເຈຍ, ເຈົ້າຟ້າງຸ່ມ ຜູ້ກໍ່ຕັ້ງອານາຈັກລ້ານຊ້າງ ໄດ້ຮັບພະພຸດທະຮູບ (ພະບາງ) ຈາກເຈົ້າຊີວິດກຳປູເຈຍ (ຜູ້ເປັນພໍ່ຂອງພັນລະຍາ) ມອບໃຫ້ກັບຜູ້ເປັນລູກສາວຂອງຕົນ.

ປັດຈຸບັນ ພະບາງ ໄດ້ປະດິດສະຖານໄວ້ຢູ່ໃນຫໍພະບາງ ທີ່ຢູ່ເບື້ອງຂວາມືຂອງບໍລິເວນພະລາຊະວັງ, ເມື່ອທ່ານເຂົ້າໄປໃນປະຕູຫຼັກ ຫ້ອງນີ້ມີແຜ່ນຫີນສີລາຈາລືກປະຫວັດຄວາມເປັນມາຂອງພະພຸດທະເຈົ້າຕັ້ງແຕ່ສະຕະວັດທີ 12 ແລະ ສິ່ງຕ່າງໆທີ່ກ່ຽວຂ້ອງກັບພະບາງເຊັ່ນດຽວກັນ

ເຊີນທ່ານທ່ອງທ່ຽວສະຖານທີຕໍ່ໄປ ຮູບຫລໍ່ເຈົ້າຊີວິດ ສຣີສວ່າງວົງ